Sidang Injil Borneo (S.I.B)

Borneo Evangelical Mission (BEM)

Kenang Pandak Penumbuh SIB

Borneo Evangelical Mission (BEM) ditumbuhka ulih Hudson Southwell lalu dibantu dua iku pengerembai Injil, iya nya Frank Davidson enggau Carey Tolley ti berasal ari Australia. Lebuh sida ke keterubah mansang ngagai menua tu, sida nepan sebuah kapal pengangkut barang ti belayar ari Melbourne nuju Singapura dalam taun 1928. Kelimpah ari sida tiga, siku pedagang ti numbuhka dagang kayu di rantau Asia Tenggara tu, Alexander Henderson sama mega enggau lalu iya tu besemaya deka mantu nirika siti palan di Pulau Borneo. Nyadi Henderson nyerara diri ari sida tiga taun siti, iya nya 1929.

Kena 12 hb November 1928, Southwell enggau Henderson datai di Kuching, Borneo. Seduai lalu dibai betemu enggau Private Secretary Raja, Gerard MacBryan sereta enggau petunggal raja ti nyadi legal adviser iya nya Willes Johnson. Raja meri pemendar ngagai seduai numbuhka siti mission di Sarawak di Limbang iy anya tungga ke timur laut negeri Sarawak. Enda lama bekau nya, Davidson enggau Tolley datai lalu nyaup seduai.

Ari rampa sejarah, Sarawak maya tu diperintah Raja Orang Putih ti ditumbuhka siku bansa British ti datai menaun ke Pulau Borneo ti benama James Brooke dalam taun 1839. Iya diganti anak menyadi iya, Charles Johnson Brooke dalam taun 1868. Charles Vyner Brooke nyadi raja ti ke tiga lalu merintah ari taun 1917. Perintah raja orang putih badu kena 1 hb Tujuh 1946 lebuh Sarawak nyadi koloni Britain.

Sarawak, Sabah enggau Malaya begulai numbuhka Malaysia dalam taun 1963. Nyau kelama, udah jaku Bahasa Malaysia ngelekai dikena, nama Gerija Borneo Evangelical diubah nyadi Sidang Injil Borneo tauka lebih dikelala enggau nama S.I.B. Diatu, mayuh gerija S.I.B udah ditumbuhka di seluruh menua Sabah enggau Semenanjung Malaysia kelimpah ari di Sarawak.